قرب .. جرب .. واللى ما يشترى يتفرج

قرررررب جرب قررررررب .. هنا مش بنهرج .. شوارعنا
بقت بقت سيرك .. واللى مايشترى يتفرررررررج

كان عندى معاد مهم فى الجامعة وبما انه معاد مهم فلازم اصحى بدرى عشان اروح لانى ايام الكلية كنت بنزل قبل المحاضرة بنص ساعة .. استعباط يعنى .. قولت فى نفسى لأ لازم اروح فى معادى فنزلت قبل المعاد بساعتين كدة على تمانية إلا كمان .. كدة بقا تبقى بدأت بجد لعنة شارع فيصل تشتغل .. المهم نزلت وهاتك يا مشى الشارع واقف كالعادة ولازم اروح امشى محطة قدام يمكن الاقيلى اى حاجة .. بعد ماتمشى محطة حتلاقى ناس كتييييير واقفين عايزين يركبوا .. الناس دول واقفين فييييين ياترى؟؟؟ .. واقفين فى الملف ياجماعة ، ايوة الملف بتاع العربيات مش بتاع البنى آدمين .. مية واقفين عند الملف ومية تانين ع الناحية اللى رايحة ومية غيرهم ع الناحية اللى جاية وصوتى ياللى اسمك إنسانة .. يالهووووووووووووى .. تقف بقا ابقى قابلنى لو حاجة عبرتك ووقفت ولو فرضنا يعنى جه ميكروباص شارد كدة وعدى كلهم بيهجموا عليه ولو فكرت مجرد التفكير انك تطلع وتحارب عشان تركب انت كمان تبقى هزأت نفسك جامد اوى اوى اوى يامعلم

يالهوى وانا حستناهم .. مشيت يجى محطة كدة كمان يعنى قول كيلو كدة ده غير الكيلو الأولانى .. السبب فى المشى ده كله ان العربيات مش بتشمى الشارع كله لأ دى بتلف عشان المسافة تبقى اقصر وتاخد فلوس اكتر .. بس ومشيت ورحت وقفت فى الملف التانى اللى بعد كيلو ..كان الوضع اهدى شوية الصراحة يعنى خمسين واحد فى الملف وخمسين ع الناحية اللى رايحة وخمسين ع الناحية اللى جاية وبس

فضلنا واقفين نستنى .. نستنى .. نستنى .. ان اى حاجة تقف لنا ؟ ابدااااااااااااااا .. لما الشمس كلت نفوخى ..ناحية الشارع فيها فاضى وبينش ولا عربية عايزة تعدى وتاخدنا والناحية التانية اللى رايحة ناحية الكوبرى واااااااااااااااقفة

المهم بقا فييييين وفيييييين لما عرفت اركب مينى باص ، اخر مكان كان موجود اخدته سيدة فاضلة كانت راكبة قبلى على طول ، مش مشكلة اقف انا والحمد لله كل اللى حواليا كانوا بنات فالأمن متستتب بفضل الله

بدل ما كنا واقفين فى الشمس بقينا واقفين فى العربية والشارع وااااااااااااااااااقف يعنى عشان الميكروباص يمشى خطوتين كدة يقعدله بتاع تلت ساعة مثلا ، كل ده الساعة تمانية ونص يعنى عز اشغال الناس وكدة .. المهم فضلت واقفة وفى ناس كانت قاعدة والمينى باص زحم ع الاخر ده غير الشارع اللى حينفجر من كتر الناس ..
والوقت يعدى ويعدى ويعدى ويعدىىىىىى ولاقيت مرة واحدة الست اللى واقفة جمب جوزها بتقوله: بقولك ايييييه انت تعزلنى من الشارع المنيل ده انا مش قادرة !ه
سمعنا وسكتنا عادى ماحنا ياما بنسمع

ومرة واحدة سمعنا صوت واحدة ست بتزعقققققققققققق وبتبهدل بكرامة واحد راكب بردو الأرض ، شتمته جامد جدا وراسها والف بتاع لاالسواق ينزله من الميكروباص .. ياستى معملتش حاجة ..اخرس يا تيييييييييييت لا اوديك البوليس انت عارف انت عملت ايه كويس !!!!!! لا حول ولا قوة الا بالله الموضوع دخل فى الغريق باين عليه .. الغريبة ان الراجل نزل فعلا من الميكروباص وهو بيقول ربنا ع المفترى

فى اثناء فترة الإذبهلال اللى كنت فيها دى لاقيت الست الفاضلة اللى قعدت على اخر كرسى كان فاضى بتميل عليا وتقولى هامسة :لو مكنش غلطان مكنش نزل ! .. قلتلها عندك حق بس كويس انه نزل اساسا اصل البجاحة زادت اليومين دول وتلاقى اللى يقول انا معلمتش حاجة ويطلعوها هى الغلطانة فى الاخر

الشارع لسة واقف زى ماقلتلكوا والتاباع بتاع البتاع - اللى هو المينى باص يعنى - نزل يلمع فيه اهو يستغل وقته واللى نام ياعينى من طول الوقفة واللى مش فاهم حاجة واللى حيتجنن وبيتصلوا بيه يستعجلوه فى الشغل واللى قاعدين ومش معبرين البنات اللى واقفة دى عشان يقعدوا .. بس والاقيلك بقا واحد ماشى وسط زحمة العربيات ماشى يتفرج على كل عربية باللى فيها والاقايهولك بيعاكس فى البنات اللى راكبين فى اى مواصلة لدرجة انه غمزلى انا كمان .. لا حول ولا قوة الا بالله يعنى نازل من بيتكوا الساعة تمانية الصبح وقالق منامك عشان تعاكس!!! ه

شوية تانية كمان كان المينى باص مشي يجى نص كيلو كدة ومرة واحدة لاقيناه فرمل فرملة جامدة اوىىىىى لدرجة ان الست اللى كانت واقفة جمبى انتطرت قدام من شدتها ورجعت تزعق وتدعى ع السواق : روح ياشيخ الله يهدك

بس يا جماعة فضلت واقفة يجى بتاع ساعة كدة لحد مارجليا وجعتنى وفيييييييين وفييييييييييين لما وصلت للمترو اللى فى شارع السودان ساعتين بجد عشان نوصل ياجماعة ، ده الواحد لو مشيها على رجلوا يوصل فى نص ساعة اساسا .. بقالى فى العذاب ده اكتر من سبع سنين كدة .. يلا حسبى الله ونعم الوكيل

المهم قبل مانزل واتشاهد انى اخيرا وصلت كانت نطت الكلمتين دول فى دماغى خدوا عندكوا






يا جماعة والايميل ده جالى وعجبنى عبر عن اللى جوايا
حبيت تشوفوه بس يا رب يعجبكوا

كده بقي يبقي انت اكيد اكيد في مصر
بصراحه عبرتى عن المعاناه بتاعتنا كلها

هههههههههههههههههههههههههههه
جااااااااااامدة بس برغم ان في حاجات كتير في مصر مستفذة جدااااااااا
وتخلي البني ادم مش طايق نفسة بس فيها حاجات بردة حلووووووة مش موجودة في اي حتة تانية غير مصر

هههههههههههههههههههههههه
ههههههههههههههههههههههههههههههههههههه
يانوش ياجااااااااااااااااااااااااااااااااااااااااااااااااامد
لا بجد الله ينور يابنت

لوكا اكيد الموضوع عجبك
علشان هى دى المعاناة اللى احنا بنمر بيها كل يوم
وبتطلع عينينا على بال ما نركب